Swansea ætlar ekki að missa Laudrup

Huw Jenkins, stjórnarformaður Swansea, segir að félagið sé nálægt því að ganga frá nýjum samningi við stjóra félagsins, Danann Michael Laudrup.

Undir stjórn Laudrup vann Swansea sinn fyrsta titil í sögunni um síðustu helgi. Swansea vann þá enska deildabikarinn.

Laudrup hefur verið orðaður við fjölda félaga upp á síðkastið en Swansea ætlar að gera allt til þess að halda honum. Félagið missti Brendan Rodgers til Liverpool síðasta sumar og ætlar ekki að lenda aftur í því sama.

"Persónulega hef ég engar áhyggjur af því að hann verði ekki hérna næsta vetur. Michael segist vilja vera hér áfram. Hann vildi finna sér félag þar sem hann gæti fundið stöðugleika. Þann stöðugleika hefur hann fundið hér," sagði Jenkins.

Samningur Laudrup rennur út árið 2014 og Swansea vill halda honum mun lengur.