Walcott segir að leikmenn verði að axla ábyrgð

Það eru fáir stjórar undir meiri pressu en Arsene Wenger, stjóri Arsenal. Hann hefur ekki unnið titil í átta ár með liðið og margir stuðningsmanna liðsins eru að gefast upp á honum.

Wenger hefur mátt þola mikla gagnrýni í fjölmiðlum í vetur og sú gagnrýni er farin að fara í taugarnar á honum. Það mátti bersýnilega sjá er hann lét blaðamenn heyra það um daginn.

Theo Walcott, leikmaður Arsenal, segir að það sé á ábyrgð leikmanna liðsins að létta ábyrgðinni af stjóranum.

Gengi liðsins í deildinni upp á síðkastið hefur verið fínt en Arsenal hefur ekki tapað í síðustu fimm leikjum.

"Stjórinn hefur alltaf haft trú á mér og strákunum. Við höfum ekki unnið neitt lengi og við verðum að fara að endurgreiða honum með því að vinna eitthvað," sagði Walcott.

"Ef við stöndum okkur ekki þá þarf hann alltaf að axla ábyrgðina og það er ekki alltaf sanngjarnt því það erum við leikmennirnir sem spilum leikinn."