Benitez: Þeir þurfa ekki að hafa áhyggjur af mér

Rafael Benitez, knattspyrnustjóri Chelsea, stýrði liði sínu inn í átta liða úrslit ensku bikarkeppninnar í kvöld en Chelsea vann þá 2-0 sigur á b-deildarliði Middlesbrough og tryggði sér leik á móti Manchester United í næstu umferð enska bikarsins.

Benitez var spurður út í þær harðar móttökur sem hann fær enn frá stuðningsmönnum Chelsea í stúkunni. „Stuðningsmennirnir eru að eyða tíma sínum í vitleysu með söngvum sínum og borðum. Þeir þurfa ekki að hafa áhyggjur af mér því ég fer eftir tímabilið," sagði Rafael Benitez.

„Ég er vonsvikinn með suma stuðningsmenn liðsins. Þær ættu frekar að styðja liðið. Ég fékk titilinn tímabundinn stjóri sem voru stór mistök. Ég er stjóri félagsins og ég stýri liðinu. Stuðningsmennirnir eru ekki að hjálpa okkur," sagði Benitez.

„Ég er fagmaður og mun sinna mínu starfi. Ég fer hinsvegar frá Chelsea í lok tímabilsins," sagði Benitez.