Bale ætlar sér að ná fram hefndum gegn Arsenal

Þegar Arsenal og Tottenham mættust fyrr í vetur þá fór Arsenal afar illa með nágranna sína. Þeir unnu leikinn 5-2 og Spurs ætlar sér að hefna um næsta helgi.

Emmanuel Adebayor kom Tottenham yfir í þeim leik en fékk svo að líta rauða spjaldið. Þá snérist leikurinn algjörlega við.

Gareth Bale, leikmaður Tottenham, segir að leikmenn liðsins séu ekkert búnir að gleyma þessum leik.

"Þetta er leikur sem allir í liðinu vilja vinna. Við byrjuðum vel síðast en rauða spjaldið fór illa með okkur. Við viljum rétta okkar hlut. Við mætum með sjálfstraustið í botni og vitum vel hversu mikilvægur leikur þetta er fyrir alla aðila," sagði Bale.