Michu framlengdi við Swansea til 2016

Spánverjinn Michu er ánægður hjá Swansea City og hefur sýnt það með því að skrifa undir nýjan samning við velska liðið sem gildir til 2016 en þetta kemur fram á heimasíðu félagsins. Michu hefur slegið í gegn á sínu fyrsta tímabili í ensku úrvalsdeildinni.

Michu hefur skorað 16 mörk í 28 leikjum með Swansea City á þessu tímabili en hann framlengdi samning sinn um eitt ár. Hann kom til Swansea í sumar frá Rayo Vallecano sem maður til að fylla í skarð Gylfa Þórs Sigurðssonar hjá félaginu.

„Þetta var auðveld ákvörðun fyrir mig. Ég er að upplifa draum hér hjá Swansea. Ég hef líklega aldrei hafi jafngaman af fótboltanum og á þessu tímabili," er haft eftir Michu á heimasíðu Swansea City.

„Það er auðvelt að spila með þessu liði og í kvöld á ég möguleika að komast í minn fyrsta úrslitaleik á ferlinum," sagði Michu en Swansea tekur þá á móti Chelsea í seinni leik liðanna í undanúrslitum enska deildarbikarsins.

Michu skoraði fyrra mark Swansea í 2-0 sigri í fyrri leiknum á Stamford Bridge en leikurinn á Liberty Stadium hefst klukkan 19.45 í kvöld og er í beinni útsendingu á Stöð 2 Sport 4.