Vidic segist vera á góðum batavegi

Nemanja Vidic, fyrirliði Man. Utd, segist enn vera að glíma við hnémeiðslin sem hann hlaut í desember árið 2011. Hann hefur aðeins verið í byrjunarliði Man. Utd í fjórtán leikjum síðan þá.

"Að spila á miðviku- og laugardögum er ekki gott og stundum verð ég að velja. Mér líður samt betur eftir hvern leik og það er gott merki," sagði Vidic.

Serbinn er bjartsýnn á að hnéð verði komið í gott stand í lok tímabilsins þó svo það verði enn bólgið eftir suma leiki.

"Það sér stundum á því og stundum ekki. Þegar ég hef orðið meiðslalaus í tvo til þrjá mánuði verð ég kominn í lag. Þetta er ekki komið til að vera. Það er eðlilegt að hnéð taki svona langan tíma að jafna sig eftir slíka aðgerð sem ég fór í. Það þarf að passa vel upp á þetta."

Vidic spilaði ekkert seinni hluta tímabilsins 2011-12 og þurfti svo að fara í aðra aðgerð í september í fyrra.