Bikarævintýri Oldham endaði á Goodison Park

Everton tryggði sér sæti í sjöttu umferð enska bikarsins og leik á móti Wigan Athletic með því að vinna öruggan 3-1 sigur á C-deildarliði Oldham á Goodison Park í kvöld í endurteknum leik úr sextán liða úrslitum keppninnar.

Oldham hafði áður slegið Liverpool út úr bikarnum en fyrri leik Everton og Oldham á heimavelli Oldham-liðsins endaði 2-2 þar sem Oldham-liðið jafnaði metin í uppbótartíma. Bikarævintýrinu hjá Oldham lauk hinsvegar í kvöld.

Kevin Mirallas kom Everton í 1-0 á 15. mínútu þegar hann lék á rangstöðuvörn Oldham-manna og afgreiddi flotta fyrirgjöf Darron Gibson í netið. Skömmu síðar átti Oldham-maðurinn Jose Baxter skot í stöngina og í kjölfarið fór boltinn greinilega í hönd Darron Gibson en engin vítaspyrna var dæmd.

Everton-liðið fékk hinsvegar vítaspyrnu á 34. mínútu fyrir hendi á varnarmann Oldham og úr henni skoraði Leighton Baines.

Leon Osman kom Everton í 3-0 á 62. mínútu eftir að hann skallaði inn fyrirgjöf Steven Pienaar en Matt Smith minnkaði muninn aðeins tæpum tveimur mínútum síðar. Matt Smith hefur þar með skorað fjögur mörk í síðustu þremur bikarleikjum liðsins á móti Liverpool og Everton (2).

Sjö af átta liðum hafa nú tryggt sér sæti í átta liða úrslitunum en á morgun spila Middlesbrough og Chelsea um síðasta sætið þar sem sigurvegarinn mætir Manchester United á Old Trafford.