Wenger setur stefnuna á annað sætið

Arsene Wenger, stjóri Arsenal, er ekki af baki dottinn þó svo allt stefni í að félagið standi uppi með tvær hendur tómar í lok tímabilsins.

Lið Wengers er úr leik í öllum keppnum nema Meistaradeildinni. Þar stendur liðið höllum fæti eftir 3-1 tap á heimavelli gegn Bayern München í fyrri leik liðanna í sextán liða úrslitum keppninnar.

Wenger segir að Arsenal geti vel náð öðru sæti deildarinnar. Liðið er níu stigum á eftir Man. City þegar ellefu leikir eru eftir.

"Það er ekki ómögulegt að ná Man. City. Þetta gæti orðið jöfn barátta allt til enda," sagði Wenger kokhraustur.

"Chelsea er rétt á undan okkur og það er raunhæft að ná City."

Arsenal hefur aldrei lent neðar en í fjórða sæti síðan Wenger tók við liðinu árið 1996.