Mörkin mikilvægu hjá Gylfa og Bale

Gylfi Þór Sigurðsson skoraði sitt fyrsta deildarmark fyrir Tottenham í kvöld þegar hann jafnaði metin í 2-2 í 3-2 sigri liðsins á West Ham á Upton Park. Tottenham komst upp í þriðja sætið með þessum sigri en sigurmark Gareth Bale var af betri gerðinni.

Gylfi kom inn á sem varamaður á 55. mínútu og var nálægt því að skora skömmu síðar þegar Jussi Jääskeläinen varði skot hans í stöng. Markið hans Gylfa kom á 76. mínútu eftir þvögu í teignum en þetta var nú ekki fallegasta markið hans í ensku úrvalsdeildinni þótt að það hafi verið langþráð.

Hér í myndbandinu fyrir ofan má sjá mörkin mikilvægu sem Gylfi og Gareth Bale skoruðu fyrir Tottenham í leiknum í kvöld en Gylfi var fyrir leikinn búinn að spila 22 deildarleiki fyrir Tottenham-liðið án þess að ná að skora.