The Times: Liverpool ekki búið að gefast upp í kapphlaupinu um Gylfa

The Times skrifar um mál Gylfa Þórs Sigurðssonar í morgun en íslenski landsliðsmaðurinn var sagður á leið til Tottenham í öllum helstu fjölmiðlum Bretlands í gær.

Blaðamaður The Times segir Liverpool ekki vera búið að gefast upp í baráttunni um Gylfa en að félagið sé þó ekki tilbúið að láta undan háum launakröfum Gylfa.

Gylfi virtist vera á leiðinni aftur til Swansea þegar Brendan Rodgers, stjóri velska liðsins, ákvað að taka við Liverpool-liðinu en Gylfi var í kjölfarið orðaður við Liverpool.

Í fyrradag bárust síðan fyrst fréttir af því að Tottenham væri búið að kaupa Gylfa frá Hoffenheim á átta milljónir punda og ætti aðeins eftir að ná samningum við Gylfa sjálfan.

Ekkert af þessu hefur verið staðfest og það eina sem heyrist úr herbúðum Gylfa er að hann muni ákveða sig um mánaðarmótin þegar lánsamningur hans hjá Swansea rennur út.