Rodgers færist nær Liverpool

BBC greinir frá því að Brendan Rodgers, stjóri Swansea, muni að öllum líkindum verða ráðinn stjóri Liverpool innan næstu 48 klukkutíma.

Samkvæmt heimildum BBC eru Swansea og Liverpool að semja um greiðslu vegna Rodgers og er talið að Swansea muni fá hátt í 5 milljónir punda frá Liverpool enda Rodgers tiltölulega nýbúinn að skrifa undir samning við Swansea.

Liverpool var líka að leita að nýjum yfirmanni knattspyrnumála en samkvæmt nýjustu fréttum mun félagið ekki fara í slíka aðgerð heldur ætlar það að treysta Rodgers fyrir öllum knattspyrnutengdum málum hjá félaginu.

Ef Rodgers fer til Liverpool er spurning hvað verður um Gylfa Þór Sigurðsson sem var á leið til Swansea. Ekki er víst að hann sé eins spenntur fyrir því að fara þangað ef Rodgers endar hjá Liverpool eins og flest bendir nú til.