Füchse Berlin komið í Meistaradeildina eftir stórsigur á Lemgo

Dagur Sigurðsson stýrði sínum mönnum í Füchse Berlin inn í Meistaradeildina á næsta tímabili þegar Refirnir tryggðu sér þriðja sætið í þýsku úrvalsdeildinni í handbolta með því að vinna tólf marka stórsigur á TBV Lemgo, 36-24.

Alexander Petersson lék vel í vörn og sókn með Füchse Berlin í fyrri hálfleiknum og skoraði þá þrjú mörk en Dagur Sigurðsson gat leyft sér að hvíla hann í seinni hálfleiknum enda yfirburðirnir mjög miklir. Þetta var síðasti heimaleikur Alexanders með Füchse Berlin en hann er á leiðinni til Rhein-Neckar Löwen.

Füchse Berlin hefur þar með þriggja stiga forskot á fráfarandi meistara í HSV Hamburg en aðeins einn leikur er eftir af mótinu.

Dagur Sigurðsson er á sínu þriðja ári með Füchse Berlin en liðið komst í fyrsta sinn í Meistaradeildina í vetur og fór þá alla leið í undanúrslitin. Liðið endaði í 9. sæti fyrsta tímabilið en náði þriðja sætinu í fyrra.

Füchse Berlin skildi Lemgo-liðið eftir í stöðunni 6-5 en Füchse-liðið vann síðustu 18 mínútur fyrri hálfleiksins 13-3 og var ellefu mörkum yfir í hálfleik 19-8. Alexander Petersson skoraði 3 mörk í fyrri hálfleiknum og stal auk þess boltanum nokkrum sinnum af leikmönnum Lemgo.

Hollendingurinn Mark Bult var markahæstur hjá Füchse Berlin með 12 mörk en hann kom í hægri skyttuna þegar Alexander var hvíldur. Bult verður í stóru hlutverki með hollenska landsliðinu sem mætir Íslandi í umspili um sæti á HM á Spáni 2013.