Wenger: Henry fer frá Arsenal 16. febrúar

Franski sóknarmaðurinn Thierry Henry mun fara frá Arsenal eftir fyrri leikinn á móti AC Milan í Meistaradeildinni og á því aðeins eftir að spila tvo leiki með liðinu. Arsene Wenger, stjóri Arsenal og landi Henry, staðfesti þetta á blaðamannafundi í dag.

Henry er í láni frá bandaríska liðinu New York Red Bulls og er búinn að vera í sex vikur hjá Arsenal. Hann skrifaði undir lánsamning 6. janúar og hefur skorað 2 mörk í 5 leikjum með liðinu þar á meðal sigurmark í fyrsta leik á móti Leeds.

MLS-tímabilið hefst 10. mars næstkomandi og mun Thierry Henry þá spila með Guðlaugi Victori Pálssyni hjá New York Red Bulls liðinu. Hann verður með í útileik á móti Sunderland um helgina og síðasti leikurinn verður síðan Meistaradeildarleikur í Mílanóborg í næstu viku.

„Ég hefði fagnað því að halda Thierry í tvær vikur í viðbót en hann verður að fara til baka. Það er bara sanngjarnt gagnvart New York," sagði Arsene Wenger en einhverjir voru að vonast til þess að Henry gæti spilað bikarleik á móti Sunderland 18. febrúar og deildarleik á móti nágrönnunum í Tottenham 26. febrúar. Svo verður ekki.