Gerrard: Allir gera sér grein fyrir mikilvægi bikarsins

Steven Gerrard segir að leikmenn Liverpool geri sér vel grein fyrir því hversu mikilvægt það er að vinna ensku bikarkeppnina - elstu bikarkeppni heims.

„Enski bikarinn er sérstök keppni - og ekki bara fyrir okkur Englendingana í liðinu," sagði Gerrard. Liverpool mætir í dag Chelsea í úrslitum keppninnar en leikið er á þjóðarvanginum Wembley í Lundúnum.

Liverpool var þar síðast fyrir þremur mánuðum síðan er liðið hafði betur gegn Cardiff í úrslitum ensku deildabikarkeppninnar.

„Allir erlendu leikmennirnir í liðinu sátu afar spenntir í búningsklefanum fyrir þann leik. Sigur í þeirri keppni mun hjálpa okkur í dag. Árangur hefur mikil áhrif á sjálfstraustið," sagði hann.

Liverpool og Chelsea hafa mæst 30 sinnum í hinum ýmsum keppnum síðan 2004 en Jamie Carragher segir að leikurinn í dag verði samt sérstakur.

„Það er bikar í húfi og það er rosalegt. Chelsea er með frábæra leikmenn og gott lið. Þeir eru enn að berjast um að komast í hóp fjögurra efstu í deildinni og eru komnir í úrslit Meistaradeildarinnar. En þeir eru með breiðan hóp og minnst tvo góða leikmenn í hverri stöðu."

„Ég á svo sem ekki von á því að leikmenn Chelsea verði að hugsa um úrslitaleikinn í Meistaradeildinni þegar við mætum þeim en það gæti hins vegar verið að einhverju verið breytt í liðsupptillingu þeirra vegna þess."