Gylfi: Ég er starfsmaður Hoffenheim

Gylfi Þór Sigurðsson hefur enn og aftur ítrekað ósk sína um að hann fái að spila áfram í ensku úrvalsdeildinni, nú í samtali við Daily Mail.

Margoft hefur komið fram að Gylfi sé ánægður í Englandi og því vilji hann allra helst vera áfram þar. Hann er nú í láni hjá Swansea en Gylfi er samningsbundinn Hoffenheim til 2014.

„Ég er starfsmaður Hoffenheim," sagði hann. „Það eina sem ég get sagt er það sem ég hef áður sagt. Ég vil vera áfram í ensku úrvasldeildinni. Ég hef viljað spila í henni síðan ég var ungur."

„Ég myndi gjarnan vilja vera áfram hjá Swansea. En þetta kemur allt í ljós í sumar - þá verður þetta leyst á einn eða annan hátt."

Stuðningsmenn Hoffenheim hafa verið duglegir við að syngja nafn Gylfa á leikjum liðsins að undanförnu og heyrði Gylfi í liðsfélaga sínum þar vegna þessa.

„Ég á erfitt með að segja hvort ég sakni félagsins. Ég á vini þar en ég var í raun aldrei ánægður. Ég vildi bara fá að spila fótbolta. En ég æfði, sat svo á bekknum og æfði aftur - í hverri viku."