Ferguson: Fletcher er að gera sitt besta

Alex Ferguson bindur vonir við að Darren Fletcher geti hafið æfingar með Manchester United þegar að undirbúningstímabilið hefst í sumar.

Fletcher hefur verið að glíma við sáraristilbólgu og hefur ekkert spilað síðan í desember vegna veikindanna.

Í vikunni var orðrómur á kreiki um að hann myndi jafnvel neyðast til að leggja skóna á hilluna en Ferguson sagði að Fletcher væri ekki búinn að gefast upp.

„Hann er að vinna í sínum málum og við vonum að hann geti æft með okkur í sumar. Það er þó erfitt að meta ástand hans þar sem að við höfum ekki þær upplýsingar sem við þurfum," sagði Ferguson við enska fjölmiðla.

„Læknar hans eru að takast á við sjúkdóminn og okkar læknir fylgist vel með. Hann er að gera sitt allra besta í þeirri von um að hann geti snúið aftur."