Cech: Boltinn fór ekki inn

Petr Cech, markvörður Chelsea, segist vera sannfærður um að boltinn hafi ekki farið allur inn fyrir marklínuna þegar að Andy Carroll skallaði að marki undir lok bikarúrslitaleiksins í Englandi í dag.

Staðan var þá 2-1 fyrir Chelsea en Carroll hafði komið inn á sem varamaður snemma í síðari hálfleik og minnkað muninn fyrir Liverpool.

Hann komst svo nálægt því að jafna metin en Cech varði skalla hans glæsilega. „Ég held að boltinn hafi ekki farið yfir línuna. Annars hefði ég ekki náð að slá hann út úr markinu," sagði Cech eftir leikinn í dag.

„Ég er ekki búinn að sjá þetta aftur í sjónvarpinu en ég var handviss um þetta strax frá fyrsta augnabliki."

„Þetta er frábært afrek hjá okkur en það er einn úrslitaleikur eftir á tímabilinu og vonandi vinnum við hann líka. Ég er nú búinn að vinna bikarinn fjórum sinnum og tilfinningin er alltaf jafn góð."