Dalglish: Dæmum tímabilið þegar það er búið

Kenny Dalglish, stjóri Liverpool, furðaði sig á því af hverju hans menn byrjuðu svo illa í bikarúrslitaleiknum gegn Chelsea í dag.

Chelsea vann, 2-1, eftir að hafa stjórnað leiknum algerlega í 60 mínútur. Liverpool kom til baka og breytti innkoma Andy Carroll miklu. En það dugði ekki til.

„Þeir voru betri fyrsta klukkutímann en við vorum góðir í lokin. Ef við hefðum spilað þannig allan leikinn værum við kannski ánægðari núna," sagði Dalglish.

Carroll komst svo nálægt því að skora jöfnunarmarkið en Petr Cech varði frá honum á marklínu. Carroll fagnaði þó og margir stuðningsmenn Liverpool.

„Ég hélt að boltinn hafði farið inn en ef það var ekki tilfellið ber að hrósa dómurunum fyrir dómgæsluna."

Liverpool er í áttunda sæti deildarinnar en vann þó ensku deildabikarkeppnina. Tímabilið hefur valdið mörgum vonbrigðum en Dalglish ætlar að bíða með að fella sinn dóm. „Við verðum að læra okkar lexíur og við getum ekki leyft okkur að spila eins og við gerðum í upphafi leiksins. Við munum dæma tímabilið að því loknu."