Enska knattspyrnusambandið ákærir Terry | Neitar sök

Enska knattspyrnusambandið hefur ákært John Terry, miðvörð Chelsea, fyrir orðbragð sitt í garð Antons Ferdinand, leikmanns QPR, í viðureign liðanna í ensku úrvalsdeildinni í október. Terry hefur neitað sök og óskað eftir fundi með aganefnd sambandsins.

Terry var sýknaður að loknum fimm daga réttarhöldum fyrir sama hlut á dögunum. Enska knattspyrnusambandið ákvað að bíða með að halda áfram með málið þar til að réttarhöldunum loknum en hefur nú kært enska landsliðsmanninn.

Terry er sakaður um að hafa haft kynþáttafordóma í frammi gagnvart Ferdinand en bar því fyrir sig að um kaldhæðnislegt svar við meintri ásökun Ferdinand um kynþáttafordóma hefði verið að ræða.

Það sjónarhóll var samþykkt fyrir dóminum fyrir tveimur vikum þar sem dómarinn taldi nægjanlega vafa leika á um hvort orð hans ætti að túlka sem móðgandi.

Þótt saksóknarinn í því máli hafi þurft að sanna að ummæli Terry hafi verið lítillækkandi án lítils vafa er sönnunarbyrðin öllu minni hjá aganefnd enska knattspyrnusambandsins þar sem hægt er að styðjast við líkindi.

Terry var gefið til 3. ágúst til að svara ákærunni en gerði það skömmu eftir að hún var gefin út í dag. Þar neitar Terry sakargiftum og hefur óskað eftir að fá að skýra mál sitt.

Verði Terry fundinn sekur verður hann væntanlega í banni í fyrstu leikjum ensku úrvalsdeildarinnar. Úrúgvæinn Luis Suarez, leikmaður Liverpool, var dæmdur í átta leikja bann á síðustu leiktíð fyrir kynþáttafordóma í garð Patrice Evra hjá Manchester United.