Vertonghen að semja við Spurs

Eins og við var búist er belgíski varnarmaðurinn hjá Ajax, Jan Vertonghen, á leið til Tottenham en leikmaðurinn staðfestir að hann geti orðið leikmaður félagsins á næstu dögum.

Þessi 25 ára leikmaður hefur stefnt að því að komast í ensku úrvalsdeildina í nokkurn tíma og er loksins að fá draum sinn uppfylltan.

"Ég er mikill aðdáandi ensku úrvalsdeildarinnar. Það er nánast eina deildin sem ég horfi á í sjónvarpinu. Þar vil ég spila og mér sýnist vera stutt í að ég kominst þangað," sagði Vertonghen.

"Ég veit til hvaða liðs ég er að fara og það er liðið sem ég vil fara til. Það vita allir hvaða lið þetta er. Þetta er Tottenham."