Van Persie talar ekki við blaðamenn á meðan EM stendur

Robin van Persie er ekki búinn að ganga frá sínum málum og framtíð hans mun ekki skýrast fyrir Evrópumótið í sumar. Arsenal hefur enn ekki fengið hann til að skrifa undir nýjan samning og Van Persie er stanslaust orðaður við Manchester City eða Juventus.

Arsenal og hollenska sambandið hafa nú komist að samkomulagi um að Robin van Persie muni ekki tala við blaðamenn á meðan á EM stendur. „Við höfum rætt þetta við Arsenal og í sameiningu ákveðið að hann muni ekki tala við fjölmiðla á EM," sagði talsmaður hollenska sambandsins við Guardian.

Arsene Wenger, stjóri Arsenal, ætlaði að reyna að ganga frá málum Robin van Persie áður en hann færi til móts við hollenska landsliðið en það tókst ekki.

Robin van Persie átti stórkostlegt tímabil með Arsenal en hann varð markahæsti leikmaður ensku úrvalsdeildarinnar með 30 mörk í 38 leikjum en hann lagði eining upp 14 mörk fyrir félaga sína. Hann er því mjög eftirsóttur enda enn bara 28 ára gamall.