Chelsea að vinna kapphlaupið um Hazard

Eden Hazard, leikmaður Lille í Frakklandi, er sagður hafa ákveðið að ganga til liðs við Chelsea í stað Manchester liðanna í sumar, eftir miklar vangaveltur um framtíð hans á undanförnum vikum.

Hazard tilkynnti á Twitter í morgun að hann væri búinn að ákveða framtíð sína en gaf þó ekki upp skýrari svör um áfangastað sinn. Chelsea eru sagðir hafa boðið honum gull og græna skóga til þess að ganga til liðs við sig, þar sem Roman Abramovich, eigandi Chelsea telur að Belginn sé lykilþáttur í uppbyggingu Chelsea liðsins.

Lengi var talið að kapphlaupið um Hazard stæði á milli Manchester risanna tveggja en að sigur Chelsea í Meistaradeildinni hafi verið stór þáttur í ákvörðun Hazard.

Hazard er einn heitasti biti Evrópu um þessar mundir en hann hefur verið í fantaformi og skorað tuttugu mörk ásamt því að gefa tuttugu og tvær stoðsendingar fyrir Lille á tímabilinu.