Peningakastið í Manchester verður rannsakað

Það varð allt vitlaust á Manchester-vellinum í dag þegar Robin van Persie, leikmaður Manchester United, tryggði liði sínu sigurinn á lokamínútum leiksins gegn grönnum sínum í Man. City.

Peningum var kastað inná völlinn með þeim afleiðingum að einn þeirra hafnaði í gagnauganu á Rio Ferdinand, leikmanni Manchester United, og blæða fór úr leikmanninum. Einn stuðningsmanna Man. City hljóp inná völlinn og virtist ætla ráðast á Rio Ferdinand en Joe Hart, markvörður Man. City, náði að stöðva aðdáandann.

Enska knattspyrnusambandið hefur gefið út yfirlýsingu þess efnis að sambandið mun rannsaka málið að fullu og fær aðstoð frá Manchester City og lögreglunni í Manchester.

„Það eru mikil vonbrigði að eftir svona frábæran leik og þessa auglýsingu fyrir ensku úrvalsdeildina að við þurfum að ræða um svona mál," sagði talsmaður enska knattspyrnusambandsins, eftir leikinn.

„Við munum vinna með klúbbnum og lögreglunni í rannsókn málsins og förum fram á það að þeir sem áttu í hlut fái ævilangt bann frá leikjum í deildinni."

„Við fyrirlítum svona atvik og munum ekki líða svona hegðun, það er einfaldlega óásættanlegt að leikmaður verði fyrir meiðslum vegna svona hegðunar."

„Við verðum alltaf að vernda leikmenn gegn svona og það verður fast tekið á málinu."

Manchester City hefur einnig gefið frá sér yfirlýsingu um málið.

„Öryggisverðir og starfsfólk vallarins mun starfa í samráði við lögregluna í Manchester og komast í botn um málið."

„Félagið vill biðja Rio Ferdinand afsökunar á þessu atviki og við vonum að hann nái sér fljótlega."

„Við munum skoða allar eftirlitsupptökur og rannsaka málið í samvinnu við lögregluna. Einnig verður rætt við vitni um málið. Þetta munum við ekki líða á okkar velli."

Hægt er að sjá myndband af atvikinu hér að ofan.