Rodgers: Samskipti við eigendur Liverpool mjög góð

Brendan Rodgers segir að hann eigi í góðu sambandi við eigendur Liverpool en að öll leikmannakaup og -sölur félagsins fari í gegnum sig.

Rodgers var áður stjóri Swansea en var ráðinn til Liverpool í vor í stað Kenny Dalglish, sem var sagt upp störfum að tímabilinu loknu.

Hann hefur nú algert frelsi til að fá þá leikmenn sem hann vill til félagsins en hann reyndi til að mynda að fá Gylfa Þór Sigurðsson, sem valdi þó á endanum að fara til Tottenham.

„Það var eitt af þeim atriðum sem hafði mikil áhrif á þá ákvörðun mína að koma hingað," sagði Rodgers við enska fjölmiðla.

„Ég tel að samskipti séu mjög mikilvæg og samband mitt við Ian Ayre framkvæmdarstjóra er mjög gott. Við tölum saman á hverjum degi."

„Ég ræði líka reglulega við eigendur félagsins sem mér finnst mikilvægt. Ég hef beinan aðgang að þeim og samskipti okkar hafa verið frábær hingað til."