Manchester United ekki í vandræðum með Gylfa og félaga

Manchester United jafnaði Manchester City að stigum á toppi ensku úrvalsdeildarinnar með 2-0 sigri á Swansea í lokaleik dagsins í ensku úrvalsdeildinni.

Gylfi Þór Sigurðsson spilaði allan leikinn fyrir Swansea en gestirnir frá Wales fengu ekki úr miklu að moða í leiknum.

Paul Scholes skoraði fyrra mark United er hann stýrði boltanum í markið með hælnum eftir sendingu Michael Carrick.

Ashley Young skoraði svo síðara markið með laglegu skoti en bæði mörkin voru skoruð í fyrri hálfleik.

United er nú með 86 stig, rétt eins og City sem vann Newcastle fyrr í dag, 2-0. City er þó með betra markahlutfall og munar átta mörkum.

United reyndi að minnka þetta bil með því að skora fleiri mörk í seinni hálfleik en allt kom fyrir ekki.

City dugir því mjög líklega sigur gegn QPR í lokaumferðinni um næstu helgi til að tryggja sér titilinn en United leikur á sama tíma gegn Sunderland á útivelli.