QPR vann mikilvægan sigur í fallbaráttunni

QPR er í lykilstöðu í fallabaráttu ensku úrvalsdeildarinnar eftir 1-0 sigur á Stoke. Bolton missti á sama tíma 2-0 forystu gegn West Brom í jafntefli.

Djibril Cisse var hetja QPR en hann skoraði sigurmarkið gegn Stoke á 89. mínútu leiksins. Það kom eftir hornspyrnu Adel Taarabt og skoraði Cisse með föstu skoti á fjarstöng.

QPR er nú með 37 stig í 16. sæti deildarinnar, jafn mörg og Wigan sem er í því sautjánda. Wigan á þó leik til góða gegn Blackburn á mánudagskvöldið. Blackburn er í nítjánda sæti með 31 stig og er hársbreidd frá falli.

Bolton hefði þurft á sigri að halda gegn West Brom og komst í 2-0 forystu. Martin Petroc skoraði á 24. mínútu og Billy Jones skoraði svo ansi klaufalegt sjálfsmark á 72. mínútu, eftir að hafa fengið boltann í sig frá Liam Ridgewell.

En eins og svo oft áður voru Bolton-menn sjálfum sér verstir og náði Chris Brunt að minnka muninn fyrir West Brom stundarfjórðungi fyrir leikslok. Jöfnunarmarkið skoraði svo James Morrison í lok leiksins, heimamönnum til mikillar gremju.

Bolton er í fallsæti eins og er og nú með 35 stig - tveimur á eftir QPR og Wigan. Bolton mætir Stoke á útivelli í lokaumferðinni og á enn möguleika á að bjarga sér, sérstaklega þar sem QPR á erfiðan útileik gegn Manchester City þar sem titill verður í húfi fyrir síðarnefnda liðið.

Wigan getur tryggt sæti sitt í deildinni og um leið fellt Blackburn með sigri í leik liðanna annað kvöld. Sá leikur hefst klukkan 19.00.

Tveir aðrir leikir fóru fram í dag. Fulham hafði betur gegn Sunderland, 2-1, og Wolves gerði markalaust jafntefli við Everton. Eggert Gunnþór Jónsson var ónotaður varamaður hjá Wolves.