Grétar Rafn og Heiðar báðir frá vegna meiðsla | Eggert á bekknum

Grétar Rafn Steinsson og Heiðar Helguson eru ekki í leikmannahópum sinna liða í leikjum þeirra í ensku úrvalsdeildinni í dag.

Eggert Gunnþór Jónsson er þó á bekknum hjá Wolves sem tekur á móti Everton á heimavelli sínum.

Grétar Rafn hefur ekkert spilað með Bolton síðan 24. apríl en þá vann liðið 2-1 sigur á Aston Villa.

Heiðar hefur aðeins komið við sögu í einum leik eftir áramót en það var í 1-0 tapleik gegn West Brom þann 14. apríl. Nárameiðsli tóku sig upp á æfingu á dögunum og óvíst hvort hann spili meira á tímabilinu.

QPR og Bolton eru bæði í harðri fallbaráttu. Liðin eru með 34 stig hvort í 17.-18. sæti deildarinnar. QPR er með betra markahlutfall og sleppur því naumlega við fall verði þetta niðurstaðan.

QPR mætir Stoke á heimavelli og Bolton tekur á móti West Brom. Leikirnir hefjast klukkan 13.00 og má fylgjast með þeim hér fyrir neðan:

13:00 Bolton - West Brom (Sport 4)

13.00 QPR - Stoke (Sport 5)

13.00 Wolves - Everton (Sport &)