Liverpool var einum degi frá greiðslustöðvun

Chrstian Purslow, fyrrverandi framvkvæmdarstjóri Liverpool, segir að félagið hafi verið einum degi frá því að fara í greiðslustöðvun áður en nýjir eigendur komu félaginu til bjargar.

Purslow sá um viðræður við John Henry og eignarhaldsfélag hans, Fenway Sports Group, fyrir einu og hálfu ári síðan.

„Fólk er fljótt að gleyma. Fyrir aðeins 15-16 mánuðum síðan var félagið einum degi frá því að fara í greiðslustöðvun en nú er fjárhagur félagsins stöðugur," sagði Purslow í samtali við BBC í gær.

„Þetta er aðeins fyrsta árið hjá Fenway og sögðu þeir þegar gengið var frá sölunni að þetta væri langtímaverkefni hjá þeim. Það er búið að fjárfesta í félaginu en það getur tekið tíma að sjá árangur af því," sagði hann.

„Fyrsta mál á dagskrá hjá eigendunum er að komast aftur í Meistaradeildina," bætti hann við og segir að með því myndu tekjur félagsins aukast og því myndi ganga betur að fá heimsklassa leikmenn til liðs við það.

Liverpool tapaði í gær fyrir Chelsea í úrslitum ensku bikarkeppninnar og er nú í áttunda sæti úrvalsdeildarinnar. Purslow hvetur þó til stillingar. „Þetta er bara fyrsta árið," sagði Purslow.