Redknapp: Má ekki vanmeta England

Harry Redknapp, sem var svo sterklega orðaður við enska landsliðsþjálfarastarfið eftir að Fabio Capello var rekinn í vetur, segir að Englendingar séu með sterkan hóp leikmanna á EM.

Það hefur þó gengið á ýmsu í herbúðum enska landsliðsins - fyrir utan þjálfaraskiptin en Roy Hodgson var ráðinn fyrir aðeins 41 degi síðan. Rio Ferdinand var ekki valinn og Gary Cahill og Kyle Walker eru frá vegna meiðsla, sem og Gareth Barry og Frank Lampard.

„Ég myndi ekki afskrifa okkur," sagði Redknapp við enska götublaðið The Sun. „Roy er með gott skipulag á liðinu og við erum með marga góða leikmenn. Markvörðurinn Joe Hart er mjög góður og Ashley Cole frábær vinstri bakvörður."

„Ég á svo erfitt að ímynda mér að það sé til betra miðvarðapar en John Terry og Joleon Lescott. Það eru svo ekki heldur margir betri til í hægri bakvarðastöðuna en Glen Johnson."

„Svo eru þeir Stevie Gerrard og Scott Parker fyrir framan þá en þeir eru báðir mjög kröftugir. Svo vantar smá töfra fram á við til að vinna leikina."

„Því miður eru þeir Frank og Gareth Barry frá og því allt útlit fyrir að Scott Parker muni spila. Það er pottþétt að Gerrard verður á miðjunni."

„Við erum því nægilega sterkir á miðjunni en það eina sem ég áhyggjur af þar er leikjaálagið," bætti Redknapp við.

England mætir Frökkum í hörkuleik klukkan 16.00 í dag en búist er við því að Frakkar muni vinna D-riðill og að Englendingar berjist við Svía og Úkraínumenn um annað sætið. England mætir Svíþjóð næst og svo Úkraínu í lokaumferðinni en þá mun Wayne Rooney væntanlega spila sinn fyrsta leik á mótinu. Hann verður í banni í fyrstu tveimur leikjunum.

„Fyrstu tveir leikirnir verða jafnir og gæti þess vegna lyktað með jafntefli. Svo kemur Rooney til baka og ég sé fyrir mér að við getum unnið síðasta leikinn."

„Þýskaland og Spánn eru líklegust til að vinna mótið en það væri ekki vitlaust að setja seðil á England. Portúgal á líka séns."

Óskastaðan fyrir Redknapp er vitanlega sú að England verði Evrópumeistari. „Þá helst eftir sigur á Þýskalandi í úrslitaleik."