Santi Cazorla orðinn leikmaður Arsenal

Spænski miðjumaðurinn Santi Cazorla er orðinn leikmaður Arsenal en þetta staðfesti félagið inn á heimasíðu sinni í dag. Cazorla er búinn að standast læknisskoðun og skrifa undir langtímasamning. Arsenal kaupir hann frá spænska félaginu Malaga en kaupverðið er ekki gefið upp.

„Santi Cazorla er mikill liðstyrkur fyrir okkur. Hann hefur mikla reynslu bæði hjá félagi og landsliði og bætir hæfileikum við okkar lið," sagði Arsene Wenger, stjóri Arsenal, á heimasíðunni.

„Hann er fjölhæfur sóknarmaður sem getur spilað á báðum köntum sem og á miðjunni. Hann hefur mikinn hraða, góða tækni og mun hjálpa Arsenal. Við erum mjög ánægðir með að hann sé kominn til okkar," bætti Wenger við.

Cazorla var kosinn leikmaður ársins á Spáni árið 2007 og hann hefur tvisvar sinnum orðið Evrópumeistari með spænska landsliðinu.

„Ég er mjög ánægður með að komast til Arsenal. Þetta er félag með frábæra leikmenn, frábæran leikvang og mikinn stuðning. Félagið hefur einn besta stjórann í fótboltaheiminum og allur heimurinn kanna að meta leikstíl liðsins. Ég er rosalega ánægður að vera að ganga til liðs við eitt flottasta félagið í Evrópu," sagði Santi Cazorla.

Santi Cazorla er þriðju kaup Wenger í sumar en hann er líka búinn að fá Lukas Podolski frá Köln og Olivier Giroud frá Montpellier.