Skilaboð Rio til Usain Bolt: Ég skal tala við stjórann

Jamaíkamaðurinn Usain Bolt tryggði sér gullið í 100 metra hlaupinu á Ólympíuleikunum í London og er þegar byrjaður í undanrásum fyrir 200 metra hlaupið. Eftir 100 metra hlaupið ítrekaði Bolt þá ósk sína að fá að komast til reynslu hjá Manchester United.

Það eru ekki miklar líkur á því að Usain Bolt fórni frjálsíþróttaferlinum fyrir Manchester United hvað þá að Sir Alex Ferguson hleypi honum inn á æfingu liðsins. Það væru samt örugglega margir til í að sjá fljótasta mann heims reyna sig í fótbolta og þar á meðal er einn leikmaður United.

Rio Ferdinand, miðvörður Manchester United, bauðst til að tala máli Usain Bolt á Old Trafford og hver veit nema að Bolt fái að reyna sig á æfingu liðsins.

„Ef þú vilt koma til reynslu hjá Man Utd, láttu mig vita. Ég skal tala við stjórann. Frábærlega gert í 100 metra hlaupinu og nú bíð ég bara eftir að sjá þig í 200 metrunum," skrifaði Rio Ferdinand inn á twitter-síðuna sína.