Pogrebnyak valdi Reading fram yfir Fulham

Rússneski framherjinn Pavel Pogrebnyak er á leið til Reading sem leikur á ný í ensku úrvalsdeildinni á næstu leiktíð.

Staðfest er á heimsíðu Reading að búið sé að semja um kaup og kjör við Pogrebnyak. Aðeins er beðið eftir að atvinnuleyfi skili sér í hús til þess að hægt sé að ganga frá samningnum.

Pogrebnyak skoraði sex mörk í tólf leikjum með Fulham á síðustu leiktíð en hann var þá í láni frá þýska félaginu Stuttgart. Samningur Pogrebnyak við Stuttgart rann út í sumar og margt sem benti til að hann væri á leið til Fulham. Rússinn hafnaði hins vegar samningstilboði frá Lundúnarfélaginu.

Pogrebnyak er 28 ára og styrkir nýliða Reading gríðarlega fyrir baráttuna framundan í ensku úrvalsdeildinni.

Pogrebnyak er annar leikmaðurinn sem gengur til liðs við Reading á tveimur dögum. Danny Guthrie, sem lék á miðjunni hjá Newcastle á síðustu leiktíð, gekkst undir læknisskoðun hjá Reading í gær og verður kynntur sem leikmaður Reading á morgun. Hann semur til þriggja ára við Reading.