Hafa fallist á nýjar viðræður við Írana

Sex áhrifamikil ríki, sem árum saman hafa átt í viðræðum við Írani um kjarnorkuáform þeirra og alþjóðlegt kjarnorkueftirlit, féllust í gær á frekari viðræður í von um lausn á deilunni, sem magnast hefur jafnt og þétt undanfarnar vikur og mánuði.

Það var Catherine Ashton, utanríkismálafulltrúi Evrópusambandsins, sem svaraði beiðni Írana um viðræðum fyrir hönd Bretlands, Frakklands, Þýskalands, Bandaríkjanna, Rússlands og Kína.

Síðustu viðræður við Írana, sem haldnar voru í ársbyrjun 2011, skiluðu þó afar litlum árangri.

Beinar og óbeinar hótanir, einkum frá Ísrael og Bandaríkjunum, um árásir á Íran hafa smám saman orðið æ háværari.

Á fundi þeirra Baracks Obama Bandaríkjaforseta og Benjamíns Netanjahús, forsætisráðherra Ísraels, í Washington um helgina sagði Netanajahú að nú væru síðustu forvöð að hefja árásir á Íran, áður en þeim tækist að koma sér upp kjarnorkuvopnum.

Obama hefur viljað fara hægar í sakirnar, en segir berum orðum að hernaður gegn Íran sé ekki útilokaður og lofar því að standa við bakið á Ísrael.

Sjálfir hafa Íranar jafnan neitað því að þeir séu að koma sér upp kjarnorkuvopnum, heldur sé stefna þeirra í kjarnorkumálum eingöngu sú að tryggja landsmönnum raforku.

Óvíst er enn hvaða áhrif úrslit þingkosninganna í Íran í lok síðustu viku munu hafa á þessar deilur.

Mahmoud Ahmadinejad forseti, sem enn á meira en ár eftir af sínu kjörtímabili, verður í minnihluta þegar nýkjörið þing kemur saman í maí. - gb