Harry Redknapp: Ég hefði sagt já

Harry Redknapp, stjóri Tottenham, viðurkenndi það í samtali við BBC Sport að hann hefði samþykkt að taka við enska landsliðinu ef enska sambandið hefði boðið honum starfið. Enska knattspyrnusambandið ákvað frekar að leita til Roy Hodgson þegar það leitaði að eftirmanni Fabio Capello.

„Ég hefði sagt já. Það hefði verið alltof erfitt að hafna slíku tilboði en þeir höfðu aldrei samband við mig. Ég elska það að þjálfa félagslið og var í raun feginn að þurfa ekki að taka þessa ákvörðun," sagði Harry Redknapp.

Harry Redknapp er orðinn 65 ára gamall og var orðaður við enska landsliðið strax frá fyrstu mínútu þegar það var ljóst að Capello hafði sagt upp störfum.

„Ég myndi fljótlega verið farinn að sakna þess að vera ekki að stýra félagsliði. Ég elska það vera að vinna með liðið mitt á hverjum degi," sagði Redknapp.

„Ég heyrði það fyrst í útvarpinu að Hodgson hefði fengið starfið eins og kannski flestir aðrir. Þetta er frábært tækifæri fyrir Roy og hann hefur verið að vinna verkefni fyrir sambandið í langan tíma," sagði Redknapp.