Drogba fer frá Chelsea í sumar

Chelsea hefur staðfest að Didier Drogba muni fara frá félaginu þegar samningur hans rennur út í sumar. Hans síðasta verk var að tryggja liðinu Evrópumeistaratitilinn.

Drogba var á mála hjá Chelsea í átta ár og vann marga glæsta sigra með félaginu. Nú síðast hampaði liðið Evrópumeistarabikarnum eftir sigur á Bayern München í úrslitaleik Meistaradeildar Evrópu.

Drogba skoraði jöfnunarmark Chelsea með glæsilegum skalla rétt fyrir leikslok og sá svo um að tryggja liðinu sigur í vítaspyrnukeppni.

„Didier er án nokkurs vafa goðsögn hjá Chelsea og verður ávallt hluti af fjölskyldunni. Hann fer nú í kjölfar mikillar velgengni en honum finnst hann þurfa nýjar áskoranir," sagði í yfirlýsingu sem birtist á heimasíðu Chelsea í dag.

Franska blaðið France Football hafði greint frá því að Drogba hafi tilkynnt liðsfélögum sínum að hann væri á leið frá félaginu. Hann hefur verið sterklega orðaður við Shanghai Shenhua í Kína sem er sagt reiðubúið að greiða honum ofurlaun.

„Ég vildi binda enda á allar vangaveltur um mína framtíð og staðfest að ég ætla að fara frá Chelsea," sagði Drogba. „Þetta var afar erfið ákvörðun fyrir mig og ég er afar stoltur af árangri okkar. En nú er tímabæt fyrir mig að finna mér nýja áskorun."

„Við höfum unnið alla titla sem hægt er að vinna og vil ég nota þetta tækifæri til að þakka öllum hjá félaginu, sérstaklega eigandanum Roman Abramovich."

„Viðræður fóru fram á góðum nótum og við óskum honum alls hins besta. Hann verður ávallt velkominn á Stamford Bridge, annað hvort sem gestur eða leikmaður," sagði Ron Gourlay, framkvæmdarstjóri Chelsea.