Wigan samþykkti tilboð í Moses

Eftir mikið japl, jaml og fuður virðist framherjinn Victor Moses loksins á leið til Chelsea. Wigan var búið að hafna fjórum tilboðum í röð frá Chelsea en samþykkti loks fimmta tilboðið.

Wigan vildi fá 9 milljónir punda fyrir leikmanninn og gaf sig ekki fyrr en Chelsea bauð þá upphæð. Leikmaðurinn má nú byrja að ræða kaup og kjör við Chelsea.

Moses sló í gegn í ensku deildinni síðasta vetur og var sterkur í leiknum gegn Chelsea um síðustu helgi.

Chelsea er þegar búið að kaupa Eden Hazard, Oscar og Marko Marin í vetur.