Ítalir vildu ekki láta vökva völlinn

Einn forráðamanna ítalska knattspyrnusambandsins hefur staðfest að hann hafi beðið um að völlurinn í Gdansk yrði ekki vökvaður fyrir leik sinna manna gegn Spánverjum.

Leikmenn Spánar kvörtuðu sáran undan vellinum og sögðu að þurrt grasið hefði hægt mjög á leiknum og gert þeim erfitt fyrir. Vicente del Bosque landsliðsþjálfari sagði að þetta hefði bitnað á gæðum leiksins.

Samkvæmt reglum má vökva völlinn fimmtán mínútum fyrir leik ef bæði liðin eru samþykk því. Demetrio Albertini, varaforseti ítalska sambandsins, sagði við spænska blaðið Marca að Ítalía hafi nýtt sér þann rétt sinn til að neita því.

„Ég skil ekki af hverju þetta er svona mikið mál. Við erum ekki vanir því að spila á völlum sem eru svona blautir. Flest lið eru ekki vön því. Þetta var ekki gert til að gera spænska liðinu grikk enda var okkur heimilt að ákveða þetta."

Spánverjar hafa líka kvartað undan því að grasið hafi verið of langt, sem hafi hægt á leiknum. „Það er ekki okkur að kenna. En mér fannst það ekki skipta máli. Við sáum frábæran leik tveggja frábærra liða."