Kalou opinn fyrir því að fara til Liverpool

Salomon Kalou er jákvæður fyrir því að spila með Liverpool á næsta tímabili, samkvæmt því sem umboðsmaður hans segir.

Kalou er með lausan samning eftir að Chelsea ákvað að framlengja ekki samning hans við félagið. Hann hefur verið orðaður við mörg félög, til að mynda Schalke í Þýskalandi.

„Það eru viðræður í gangi og maður verður að passa sig á því hvað maður segir opinberlega á því stigi málsins," sagði umboðsmaðurinn Rodger Linsen við Liverpool Echo í dag.

„Liverpool er stórt félag og það er gaman að heyra af því að það hafi áhuga á Salomon. Hann átti góðan tíma hjá Chelsea og það verður erfitt að finna honum betra félag. En hann er opinn fyrir öllum möguleikum og væri vel til í að spila áfram í Englandi."