Deildarkeppnin í forgangi hjá Brendan Rodgers

Brendan Rodgers, knattspyrnustjóri enska úrvalsdeildarliðsins Liverppol, segir að deildarkeppnin sé í algjörum forgangi hjá liðinu á næsta tímabili. Liverpool leikur í kvöld fyrri leikinn í Evrópudeild UEFA gegn FC Gomel frá Hvíta-Rússlandi í þriðju umferð í kvöld.

Rodgers stýrir Liverpool í fyrsta sinn í opinberum leik en hann tók við starfinu í sumar eftir að Kenny Dalglish var sagt upp störfum. „Ég vil ekki draga úr mikilvægi Evrópukeppninnar, en við munum leggja alla áherslu á ensku úrvalsdeildina og við ætlum að enda eins ofarlega á töflunni og við getum," segir Rodgers í viðtali á heimasíðu félagsins.

„Við viljum líka ná árangri í Evrópudeildinni, og til þess að það gangi upp þurfum við að leika marga leiki, og vonandi verður það raunin. Allar keppnir skipta máli fyrir félag eins og Liverpool," sagði Rodgers en hann var áður knattspyrnustjóri Swansea.

FC Gomel endaði í þriðja sæti í deildarkeppninni á síðustu leiktíð en fagnaði sigri í bikarkeppninni.

Framherjinn Andy Carroll, sem hefur verið orðaður við Newcastle og West Ham, fór ekki með liðinu til Hvíta-Rússlands vegna smávægilegra meiðsla. Fabio Borini gæti leikið sinn fyrsta alvöruleik með liðinu í kvöld en Luis Suarez og Craig Bellamy eru fjarverandi vegna þátttöku þeirra á ÓL í London.