Martinez: Aprílmánuður sá ótrúlegasti í sögu Wigan

Roberto Martinez, knattspyrnustjóri Wigan, var hæstánægður með frammistöðu sinna manna í 4-0 sigrinum á Newcastle í dag. Wigan hefur náð ótrúlegum úrslitum í undanförnum leikjum og er þremur stigum frá fallsæti þegar tvær umferðir eru eftir.

„Aprílmánuður hefur líklega verið sá ótrúlegasti í sögu félagsins. Leikirnir gegn Manchester United, Arsenal og nú Newcastle. Form okkar er frábært og full ástæða til að fagna því," sagði Martinez við BBC-fréttastofuna að leik loknum.

Martinez sagði liðsmenn sína hafa spilað vel á árinu, jafnvel og í fyrri hálfleik í dag. Í dag hefðu menn hins vegar nýtt færin.

„Í dag höfðu við sjálfstraustið til þess að klára færin. Afgreiðslurnar voru frábærar og frammistaðan í fyrri hálfleik til jafns við þá í leiknum gegn Manchester United.

Martinez segir fulla ástæðu til að gleðjast í dag og í ljósi undanfarins árangurs. Á morgun taki hins vegar við undirbúningur fyrir næsta leik gegn Blackburn.

„Það er frábært að leggja þessi lið að velli en það skiptir engu ef markmiðið næst ekki. Við viljum halda sæti okkar í deildinni og það eru tveir leikir eftir, úrslitaleikir."