Manchester City vann tíu menn Chelsea - Chelsea manni færri í 47 mínútur

Englandsmeistarar Manchester City byrjuðu tímabilið eins og þeir enduðu það eða með því að vinna titil. Liðið vann 3-2 sigur á bikarmeisturum Chelsea á Villa Park í árlegum leik meistaraliða síðasta árs um Samfélagsskjöldinn.

Fernando Torres kom Chelsea í 1-0 á 40. mínútu eftir undirbúning Ramires en aðeins þremur mínútum síðar urðu Evrópumeistararnir fyrir áfalli þegar Branislav Ivanovic fékk beint rautt spjald fyrir hættulega tæklingu. Staðan var 1-0 í hálfleik en City-menn skoruðu síðan þrjú mörk á tólf mínútna kafla í seinni hálfleiknum.

Yaya Touré skoraði fyrsta markið á 53. mínútu, Carlos Tévez kom City yfir á 59. mínútu með frábæru skoti eftir sendingu Samir Nasri og Nasri skoraði síðan þriðja markið á 65. mínútu eftir fyrirgjöf frá Aleksandar Kolarov.

Tíu menn Chelsea voru ekki tilbúnir að gefast upp og náðu að setja smá spennu í leikinn í lokin. Ryan Bertrand minnkaði muninn í 3-2 á 79. mínútu þegar hann fylgdi á eftir skoti Daniel Sturridge en báðir voru þeir nýkomnir inn á sem varamenn.

Manchester City vann þarna meistarakeppnina í fyrsta sinn í 40 ár eða síðan að liðið vann 1-0 sigur á Aston Villa en sá leikur fór einnig fram á Villa Park.