Porto samþykkir 38 milljóna punda tilboð Chelsea í Hulk

Allt bendir til þess að Brasilíumaðurinn Hulk gangi til liðs við Chelsea. Porto hefur samþykkt 38 milljóna punda, tæplega átta milljarðar íslenskra króna, tilboð Lundúnarliðsins í sóknarmanninn. Hulk gengur nú til samningaborðsins og ræðir við forráðamenn Chelsea um kaup og kjör.

Breski vefmiðilinn Guardian greindi frá þessu í gærkvöldi. Að sögn miðilsins vill Hulk ólmur komast til stærra félags og ekki reiknað með því að launakröfur kappans verði til þess að spilla vistaskiptunum.

Roman Abramovich, eigandi Chelsea, á enn eftir að ráða knattspyrnustjóra fyrir næstu leiktíð. Orðrómur hefur verið uppi um að Roberto Di Matteo, sem stýrði liðinu til bráðabirgða og gerði það að Evrópu- og bikarmeisturum, fengi eins árs samnings. Ekki hefur þó verið gengið frá neinu.

Allt útlit er fyrir töluverðar breytingar á leikmannahópi Chelsea fyrir næstu leiktíð. Ljóst er að Didier Drogba hefur leikið sinn síðasta leik fyrir félagið. Sömu sögu er að segja um Jose Bosingwa og Salomon Kalou auk þess sem félagið er tilbúið að hlusta á tilboð í Florent Malouda og Michael Essien.

Allt útlit er fyrir að Belgínn Edin Hazard sé á leið til félagsins og þá hafa Marko Marin, frá Werder Bremen, og Kevin de Bruyne, frá Genk, einnig gengið til liðs við Lundúnarfélagið.