Svona tækifæri kemur kannski bara einu sinni

Brendan Rodgers var kynntur sem nýr stjóri hjá Liverpool í dag. Rodgers segir að hann hafi alltaf verið fyrsti kostur félagsins sem arftaki Kenny Dalglish.

Liverpool ræddi við Roberto Martinez, stjóra Wigan, á undan Rodgers enda hafði Rodgers lýst því yfir að hann hefði ekki áhuga á starfinu.

"Ég hafnaði þeim í fyrstu því ég vildi ekki því ég vildi ekki koma einhverju ferli í gang sem væri þess utan vanvirðing við Swansea. Þegar þeir komu síðan aftur og sönnuðu að ég væri þeirra aðalkostur þá verður maður að hugsa málin upp á nýtt," sagði Rodgers við fjölmiðil í Wales.

"Á síðustu árum hafa breskir stjórar ekki fengið mörg tækifæri hjá stóru liðunum. Þegar tækifærið kemur, og það kemur kannski bara einu sinni, þá verður maður að taka ákvörðun."

Rodgers viðurkennir að tækifærið til þess að stýra fornfrægu félagi eins og Liverpool hafi einfaldlega verið of gott til þess að hafna því.

"Ég hefði aldrei farið frá Swansea nema virkilega stórt félag hefði falast eftir mínum kröftum. Þetta var gríðarlega erfið ákvörðun því það stóð aldrei annað til en að vera lengi hjá Swansea.

"Ég hef alltaf verið heiðarlegur og sagði að ég myndi aldrei vera hjá félaginu að eilífu en ég átti samt ekki von á því að fá þetta tækifæri núna.

"Liverpool er eitt af stórveldum boltans. Félagið hefur unnið fimm Evrópubikara og er á stalli með AC Milan, Inter, Real Madrid, Barcelona og FC Bayern."