Eigandi Liverpool vill ræða við Brendan Rodgers á morgun

Liverpool hefur enn áhuga á því að ræða við Brendan Rodgers, stjóra Swansea, um möguleikann á því að hann verði eftirmaður Kenny Dalglish á Anfield. Enskir fjölmiðlar segja frá því að eigandi Liverpool sé kominn til Englands og ætli að ræða við Rodgers á morgun.

Brendan Rodgers gaf lítið fyrir áhuga Liverpool fyrir tíu dögum og sagðist þá hafa engan áhuga á því að gerast stjóri Liverpool. Það kemur því svolítið á óvart að Liverpool sé enn að eltast við hann ekki síst þar sem viðræðurnar við Roberto Martínez hafa gengið vel.

Guardian hefur heimildir fyrir því að Brendan Rodgers sé fyrsti kostur hjá Liverpool og að menn þar á bæ séu sannfærðir um að hann breyti um afstöðu sína þegar hann fær formlegt tilboð í hendurnar.

John W Henry, aðaleigandi félagsins, er kominn til Liverpool og hefur sett stefnuna á það að ganga frá nýjum stjóra fyrir föstudag.

Brendan Rodgers var í fríi í Bandaríkjunum og hitti stjórnarformann Swansea í gær. Hann er nýbúinn að gera þriggja og hálfs árs samning við velska félagið en það er talið að Liverpool geti keypt upp samninginn fyrir fimm milljónir punda.