Mancini jafnaði afrek Sir Alex Ferguson í kvöld

Roberto Mancini, stjóri Manchester City, stýrði City-liðinu í hundraðasta sinn í ensku úrvalsdeildinni í kvöld en City hélt upp á tímamót stjórans með því að vinna 3-1 sigur á Queens Park Rangers.

Þetta var 62. sigur Mancini í ensku úrvalsdeildinni og hann jafnaði þar sem afrek Sir Alex Ferguson, stjóra Manchester United, sem stýrði einnig United-liðinu 62 sinnum til sigurs í fyrstu 100 leikjum sínum.

Manchester City hefur nú unnið 62 leiki, gert 19 jafntefli og aðeins tapað 19 leikjum undir stjórn Roberto Mancini og mark Edin Dzeko, sem kom City í 2-1 í leiknum, var það 200. sem City skorar undir stjórn Mancini.

Sir Alex Ferguson heldur reyndar upp á enn stærri tímamót á morgun en United mun þá leika þúsundasta deildarleikinn undir hans stjórn þegar það sækir Southampton heim. Manchester United hefur unnið 598 af þessum 999 leikjum undir stjórn Skotans.