Rosicky frá í tvo mánuði

Tékkneski landsliðsfyrirliðinn Tomas Rosicky verður ekki með Arsenal í upphafi tímabilsins því hann þurfti að fara í aðra aðgerð á hásin og verður því frá keppni í sex til átta vikur. Þetta kom fram í tékkneskum fjölmiðlum í dag en þar kemur fram að Rosicky sé þegar byrjaður í endurhæfingu eftir seinni aðgerðina.

„Það voru bólgur í kringum hásinina sem þurfti að huga að. Hann er þegar byrjaður hjá sjúkraþjálfara," sagði umboðsmaður hans Pavel Paska við aðal íþróttadagblaðið í Prag.

Rosicky er orðinn 31 árs gamall en hann átti góðan endasprett á síðasta tímabili og var síðan í stóru hlutverki með tékkneska landsliðinu á EM í sumar. Rosicky meiddist á Evrópumótinu og missti þá af síðustu tveimur leikjum liðsins vegna vandræða með hásinina.

Rosicky hefur leikið með Arsenal frá árinu 2006 en missti alveg af 2008-09 tímabilinu vegna meiðsla. Hann spilaði 28 leiki með liðinu á síðasta tímabili sem er það mesta hjá honum á sex tímabilum sínum með Arsenal.