Svona lagði Gylfi upp markið fyrir Bale í nótt

Gylfi Þór Sigurðsson og Gareth Bale eru strax byrjaðir að ná vel saman hjá Tottenham. Gylfi lagði upp mark fyrir Bale í 1-1 jafnteflisleik á móti Los Angeles Galaxy í nótt og hefur Gylfi því átt þátt í marki í fyrstu tveimur leikjum sínum í búningi Spurs.

Gylfi byrjaði leikinn á miðjunni á meðan að Hollendingurinn Rafael van der Vaart var í holunni fyrir aftan framherjana. Van der Vaart fór seinna meiddur af velli og þá færði Andre Villas-Boas Gylfa framar á völlinn. Portúgalski stjórinn hefur talað um að Gylfi og Van der Vaart muni bítast um þessa stöðu á þessu tímabili.

Gylfi lagði upp markið strax á 17. mínútu leiksins þegar hann fékk boltann út á vinstri vængnum og gaf frábæra fyrirgjöf á Bale sem skallaði glæsilega í markið.

Það er hægt að sjá stoðsendingu Gylfa á Youtube-vefnum eða með því að smella á tengilinn hér fyrir ofan.