Oscar orðinn leikmaður Chelsea

Brasilíski miðjumaðurinn Oscar er genginn til liðs við Evrópumeistara Chelsea frá Internacional í heimalandinu. Kaupverðið er talið vera um 25 milljónir punda eða sem nemur um fimm milljörðum íslenskra króna.

Oscar, sem er í knattspyrnulandsliði Brasilíu á Ólympíuleikunum í London, hafði áður gengist undir læknisskoðun hjá Lundúnarliðinu. Hann þótti standa sig mjög vel í 2-0 sigri Brasilíu á Bretlandi í æfingaleik á dögunum.

Nýjum leikmönnum hjá Chelsea heldur því áfram að fjölga. Áður hafði Marko Marin komið frá Werder Bremen og Eden Hazard frá Lille.