Cole mun ekki kvarta yfir vafasömu tísti Rios

Rio Ferdinand, varnarmaður Man. Utd, var duglegur að tjá sig á Twitter meðal réttarhöldin yfir John Terry stóðu yfir. Þau snérust um hvort Terry hefði verið með kynþáttaníð í garð bróður Rios, Anton.

Eins og kunnugt er var Terry sýknaður. Það fór augljóslega nokkuð í taugarnar á Rio er Ashley Cole, bakvörður Chelsea og félagi bæði Terry og Rio, hélt því fram í vitnastúkunni að Terry væri ekki rasisti.

Þá svaraði Rio meðal annars tísti á Twitter um að Cole væri súkkulaðiís og hafði gaman af. Mörgum fannst það afar óviðeigandi, jafnvel kynþáttaníð, og spunnust miklar umræður um málið á samskiptasíðunni.

Cole hefur nú sent frá sér yfirlýsingu þar sem hann segist ekki ætla að aðhafast neitt í málinu.

"Ég veit af þessu máli og vil taka fram að við Rio erum góðir vinir. Ég ætla mér ekki að leggja inn neina kvörtun vegna málsins. Ég veit að menn bregðast oft illa við og hugsa málin ekki til enda áður en þeir tjá sig á Twitter," segir í yfirlýsingu frá Cole.

Rio var ekki sammála því að tistið hans væri kynþáttaníð eins og margir töldu. Hann eyddi þó færslunni samt.