Villas-Boas mættur til Englands

Enskir fjölmiðlar greina frá því í dag að Andre Villas-Boas sé kominn til Englands og að hann gæti skrifað undir samning við Tottenham á næsta sólarhring.

Villas-Boas hefur verið atvinnulaus síðan að hann var rekinn sem knattspyrnustjóri Chelsea í upphafi marsmánaðar eftir aðeins níu mánuði í starfi.

Eftir að slitnaði upp úr samningaviðræðum Harry Redknapp við forráðamenn Tottenham um nýjan samning fór Lundúnarliðið að leita sér að nýjum þjálfara. Nú er yfirgnæfandi líkur taldar á því að Villas-Boas verði eftirmaður Redknapp.

Samkvæmt fréttum Sky Sports mun samkomulag vera í höfn um þriggja ára samning og að hann hafi flogið til Englands í gærkvöldi. Hann mun þó ekki vera kynntur formlega til sögunnar sem stjóri Tottenham fyrr en í næstu viku, en þá hefst undirbúningstímabil Tottenham.

Gylfi Þór Sigurðsson hefur verið orðaður við Tottenham en hann er sagður ætla gera upp hug sinn í vikunni.